د مطبعو، خطاطانو او رسامانو د اتحادیې له غړو سره ناسته وشوه
تېره ورځ د ننګرهار د اطلاعاتو او کلتور رئيس مولوي نور محمد حنيف په خپل کاري دفتر کې د ياد ولايت د مطبعو، خطاطانو او رسامانو د اتحاديې له غړو سره ناسته وکړه.
د يادې ناستې موخه په ننګرهار ولايت کې د لوحو او تابلوګانو د کمېټې له طرزالعمل څخه د مطبعو، خطاطانو او رسامانو خبرول وو، چې د اطلاعاتو آمر مولوي صديق الله قريشي له لوري د لوحو او تابلوګانو د کمېټې د طرزالعمل په اړه له دوی سره معلومات شريک شول.
د اطلاعاتو او کلتور رئيس مولوي نورمحمد حنيف د يادو اتحاديو غړو ته وويل: په ننګرهار ولايت کې د لوحو، تابلوګانو او تبليغاتي اعلاناتو په سمون کې لويه ونډه ستاسو ده، کومې لوحې چې تاسو ته د چاپ په موخه درکول کېږي، له چاپ مخکې يې د اطلاعاتو او کلتور رياست سره شريکوئ، تر څو د بهرنيو ژبو د ليکدود او اصطلاحاتو مخنيوی وشي.
د يادو اتحاديو مسؤلينو د اطلاعاتو او کلتور رئيس ته په دې برخه کې د هر ډول همکارۍ ډاډ ورکړل شو.
۱۴۴۵/۶/۱۱هـ ق
۱۴۰۲/۱۰/۳ هـ ش
