ارزګان کې د کتاب د اونۍ په نوم د کتاب يو ورځنی نندارتون جوړ شو
تېره ورځ د ارزګان ولایت د اطلاعاتو اوکلتور رياست له لوري د کتاب د اونۍ په نوم د کتاب يو ورځنی نندارتون جوړ شو.
د یاد نندارتون په اړه د دغه ولایت د اطلاعاتو او کلتور رياست مسؤلين وايي، یاد نندارتون يې مطالعې ته د هڅونې په موخه جوړ کړی دی، دوی پر ځوانانو غږ وکړ، چې خپل قيمتي وخت بې ځايه تېر نکړي کتابونه ولولي تر څو د علم او پوهې له لارې ټولنې ته خدمت وکړي.
د نندارتون ګډونوالو هم د کتاب او مطالعې په اړه خپل نظرونه شریک کړل او ویې ويل، مطالعه د ځوانانو پر ذهن مثبت اغېز کوي، ذهن ځواکمنوي، مطالعه پرمختګ ته لاره هواروي او په ټولنه کې علمي کچه لوړوي.
همداراز دوی د ياد نندارتون په جوړولو خوښي څرګنده کړه او د ورته نورو نندارتونونو د جوړولو غوښتنه يې وکړه.
۱۴۴۴/۱۱/۱۰ هـ ق
۱۴۰۲/۳/۹ هـ ش
