د لغمان والي ته د رسنیو او خبریالانو سره د ښې همکارۍ له امله مننلیک ورکړل شو
د افغانستان د ژورنالېستانو ملي اتحادیې لخوا د لغمان والي الحاج قاري زین العابدین عابد ته د رسنیو او خبریالانو سره د همکارۍ، رسنیزو فعالیتونو ته د ښې زمینې برابرولو او د خبریالانو د تشویق او هڅونې په موخه مننلیک ورکړل شو.
یاد مننلیک د یوې غونډې په ترڅ کې د اطلاعاتو او کلتور رئیس مولوي عبدالنور رسولي، د افغانستان د ژورنالېستانو ملي اتحادیې استازي عنایت الله زیارمل، د اطلاعاتو آمر او د یادې اتحادیې ولایتي مسؤل عتیق الله قریشي په لاسونو د لغمان والي ته ورکړل شو.
په ياده غونډه کې د اطلاعاتواو کلتور رئیس مولوي عبدالنور رسولي د لغمان د رسنیو په اړه لنډ معلومات شریک کړل او خوښي یې وښوده چې په لغمان کې رسنیزه برخه ښه فعاله ده.
د ناستې په وروستۍ برخه کې د لغمان والي الحاج قاري زین العابدین عابد په لغمان کې د رسنیزو فعالیتونو په برخه کې د اطلاعاتو او کلتور ریاست، د ژرونالېستانو د ملي اتحادیې او د ټولو رسنیو فعالیتونه وستایل.
نوموړي د رسنیو د ملاتړو ادارو څخه وغوښتل چې د لغمان د خبریالانو د مسلکي روزنې په موخه د ظرفیت لوړونې پروګرامونه ترسره کړي او په یاده برخه کې یې د هر راز همکارۍ ډاډ ورکړ.
۱۴۴۴/۱۱/۲ هـ ق
۱۴۰۲/۳/۱ هـ ش
