د اطلاعاتو آمرینو، د جریدو او باختر خبري آژانس مدیرانو او خبریالانو ته د ظرفیت لوړونې روزنیز سیمینار پای ته ورسېد
دوشنبه (١٤ د جماديالاول ١٤٤٨) د اطلاعاتو او فرهنګ وزارت د خپرونو چارو معینیت اړوند د باختر خبري آژانس له لوري د اطلاعاتو آمرینو، د جریدو او د باختر خبري آژانس مدیرانو او خبریالانو ته د ظرفیت لوړونې درې ورځنی روزنیز سیمینار پای ته ورسېد، چې پکې د چارو ادارې عمومي رئیس شیخ نورالحق انور، د خپرونو چارو معین ښاغلي مهاجر فراهي او د اطلاعاتو او فرهنګ وزارت رئيس صاحبانو ګډون کړی وو.
د چارو ادارې عمومي رئیس شیخ نورالحق انور ګډونوالو ته د وینا په مهال وویل: د اطلاعاتو او فرهنګ وزارت د نظام له مهمو ادارو څخه یوه ده، چې ډیر مهم مسؤلیتونه لري، په معاصره نړۍ کې د دې ادارې اهمیت ورځ تر بلې زیاتېږي، دا اداره د نظام د ژبې او غوږونو حیثیت لري، ښاغلي انور ګډونوالو ته په خطاب کې وویل: د ا.ا.ا په وړاندې د منفي تبلیغاتو او فکرې جګړې څپه ورځ تر بلې پراخېږي، تاسو یاست چې د حقایقو په خپرولو یې مخنیوی کولای شي، د مشرتابه د فرامینو په خپرولو او تطبیق کې لا نورې هڅې هم وکړئ.
ښاغلي انور زیاته کړه؛ په رسنیز ډګر کې د پرمختګونو شاهدان یو، د پروژه یی رسنیو مخه نیول شوې ده، د ا.ا.ا د اسلامي او افغاني ارزښتونو په رڼا کې د بیان ازادۍ ته ژمن دی، هیوادوال مو داسې ازادي نه غواړي، چې له افراط او تفریط څخه ډکه وي، یا د ازادۍ په نوم انساني ارزښتونه تر پښو لاندې کوي.
همدا راز د سیمینار په ترڅ کې د اطلاعاتو آمرینو، د جریدو او باختر آژانس مدیرانو او خبریالانو ته د مسلکي ښوونکو له لوري د رسنیو، خبر، راپور، ټولنیزو شبکو اړوند ښوونیز مواد تدریس شول.
د سیمینار په پای کې د باختر خبري آژانس ریاست له لوري د سیمینار ګډونوالو ته ستاینلیکونه هم ووېشل شوې، چې ورسره یاد درې ورځنی سیمینار هم پای ته ورسېد.
١٤٠٤/٨/٤ ه ل
