د هنري فعالیتونو پیاوړتیا په موخه له خطاطانو او رسامانو سره د همغږۍ ناسته وشوه
د لوګر اطلاعاتو او فرهنګ ریاست له لوري د هنري فعالیتونو پیاوړتیا په موخه له خطاطانو او رسامانو سره د همغږۍ ناسته وشوه.
د اطلاعاتو او فرهنګ رئیس مولوي ثواب جان اسلامیار وویل: خطاطي او رسامي هغه ارزښتمن هنرونه دي، چې د ټولنې تاریخ، فرهنګ او هویت ژوندي ساتي، په لاس لیکل او هنري اثار جوړول ستر هنر دی او اړتیا ده، چې د راتلونکو نسلونو لپاره خوندي وساتل شي. نوموړي له هنرمندانو څخه وغوښتل، چې د هنر او فرهنګ د ودې په موخه له اطلاعاتو او فرهنګ ریاست سره همکاري دوامداره وساتي.
ورته مهال هنرمندانو غوښتنه وکړه، چې د اطلاعاتو او فرهنګ ریاست په چوکاټ کې دې د هنري آثارو لپاره ځانګړې ګالري فعاله شي، ترڅو هنري آثار نندارې ته وړاندې شي، خلک له هنري آثارو سره لا ښه آشنا شي او هنري اثارو ته بازار موندنې وشي.
د یادونې وړ ده، چې دا مهال په لوګر ولایت کې لسګونه تنه د خطاطۍ او رسامۍ په برخه کې فعالیت کوي.
۱۴۴۷/۱۲/۱ هـ ق
