په هرات کې د تاریخي او معمارۍ میراث په اړه د دوو کتابونو مخکتنه وشوه
په هرات کې د «تیموریانو په دوره کې معماري، د هرات تاریخي ودانیو ته په ځانګړې کتنې سره» او «د هرات فرهنګي میراث او د ۱۴۰۲ کال زلزلې پر تاریخي آبداتو اغېزې» تر سرلیکونو لاندې د دوه کتابونو مخکتنه وشوه.
د هرات د اطلاعاتو او کلتور ریاست مسوولینو د دغو کتابونو له چاپ او فرهنګي هڅو هرکلی وکړ او د لیکوالانو ستاینه یې وکړه. دوی د څېړونکو او فرهنګیانو له خوا د هرات تاریخي آثارو او معمارۍ ته د پاملرنې پر ارزښت ټینګار وکړ.
د فرهنګ او هنر آمر وویل: د روان کال په ترڅ کې د هرات او د دې ولایت د تاریخي آبداتو په اړه څو کتابونه چاپ شوي، چې دا یو د ستاینې وړ اقدام دی.
د دغو اثارو لیکوالان وایي: د کتابونو له لیکلو موخه دا ده چې خلک د هرات د تاریخي آبداتو د ارزښت او نړیوال مقام په اړه خبر شي او د هغو د ساتنې او له ویجاړېدو څخه د مخنیوي لارې چارې وړاندې شي.
ځینو فعالانو هم وویل: چې د هرات تاریخي آبدات په نړیواله کچه ځانګړی ارزښت لري او اړینه ده چې مسوولین او خلک د دغو ودانیو په ساتنه او پالنه کې هېڅ ډول هڅه و نه سپموي.
فرهنګیان باور لري، چې دا کتابونه کولی شي د هرات د فرهنګي میراث د پوهاوي او ساتنې په برخه کې اغېزناک رول ولوبوي.
۲۳/۸/۱۴۴۷ هـ ق
