سلګونه زده کوونکو ته د وړیا زده کړو زمینه برابره شوه
د لوګر ولایت د اطلاعاتو او کلتور ریاست او یو خصوصي ښوونیز مرکز په ګډو همکاریو د ځوانانو چارو آمریت اړوند ښوونیز مرکز کې شاو خوا ۱۰۰۰ تنه زده کوونکو ته د وړیا زده کړو زمینه برابره شوه.
د اطلاعاتو او کلتور رئیس مولوي فیض الله جوهري د یاد خصوصي ښوونیز مرکز له همکاریو څخه مننه وکړه او ویې ویل: ځوانان د هېواد راتلونکي رهبران دي او هر هغه څوک چې د ځوان نسل د ښوونې او روزنې په برخه کې هڅې کوي، هم ثواب ترلاسه کوي او هم د هېواد په وړاندې خپل واقعي مسؤولیت ترسره کوي.
دغه راز د یاد خصوصي ښوونیز مرکز استازي وویل: د استادانو او زده کوونکو د هڅونې په موخه د اطلاعاتو او کلتور ریاست سره به همکاریو ته دوام ورکړي.
د یادونې وړ ده، چې د ځوانانو چارو آمریت اړوند وړیا ښوونیز مرکز د ژمني پروګرام په لړ کې به شاوخوا ۱۰۰۰ تنو زده کوونکو ته د انګلیسي، کمپیوټر، خطاطۍ، ویناوالۍ، املا او انشا په برخو کې زده کړې ورکړل شي.
۱۴۴۷/۷/۳ هـ ق
