دایکندي کې د مطالعې دود عامولو په موخه د کتابتونونو له مسؤلینو سره ناسته وشوه
د دایکندي ولایت د اطلاعاتو او کلتور رئیس قاري خالد احمد فضلي په مشرۍ د مطالعې دود عامولو په موخه د کتابتونونو له مسؤلینو سره ناسته وشوه.
د اطلاعاتو او کلتور رئیس قاري خالد احمد فضلي د ناستې ګډونوالو ته د ښه راغلاست ترڅنګ وویل: د ټولنې په ځانګړې توګه د ځوانانو د علمي ظرفیتونو د ودې په موخه د کتابتونونو مسؤلینو رول خورا مهم دی او کولای شي، چې په ټولنه کې د مطالعې دود عام کړي.
ښاغلي فضلي زیاته کړه؛ د اطلاعاتو او کلتور ریاست ځوانانو ته د کمپیوټر او انګلیسي ژبې وړیا ښوونیز مرکز جوړ کړی دی او په پام کې لري، چې په دې ولایت کې د کتاب لوستنې ازموینې هم جوړې کړي، چې په دې برخه کې د کتابتونونو مسؤلینو رول خورا مهم او اغیزمن دی، د اطلاعاتو او کلتور رئیس ځوانان د ټولنې د ملا تیر وبلل او د دوی له ملاتړ څخه يې پوره ډاډ څرګند کړ.
۱۴۴۷/۶/۹ هـ ق
