کابل کې د ځوانانو اقتصادي پياوړتيا مرکز څخه ۵۰ تنه ځوانان فارغ شول
د اطلاعاتو او کلتور وزارت د ځوانانو چارو معینیت اړوند د ځوانانو اقتصادي پياوړتيا مرکز د کار او کسب د زده کړو څخه په کابل کې ۵۰ تنه ځوانان فارغ شول.
په دې اړوند جوړ شویو مراسمو کې د اطلاعاتو او کلتور وزارت د ځوانانو چارو معینیت د رضاکارو ځوانانو او سالمو افکارو د ترویج رئیس قاري حمدالله سعید، د ځوانانو د برنامو د تنظیم رئیس حضرت الله شریفي، یو شمېر نورو مسؤلینو، ځوانانو او د رسنیو استازو ګډون کړې وو.
ښاغلي حضرت الله شریفي وویل: د دغه برنامو څخه موخه ځوانانو ته د کار زمینه برابرول او د غیر قانوني مهاجرت مخنیوی دی او داسې پروګرامونه جوړول د ځوانانو په پرمختګ کې ګټور دي.
دغه راز فارغ شویو ځوانانو وویل: داسې پروګرامونه د ځوانانو د اقتصادي خپلواکۍ لپاره اړینې دي او د دغو پروګرامونو د لا پراخوالي ډېروالي غوښتنه یې وکړه.
د یادونې وړ ده، چې فارغ شویو ځوانانو د مبایل، کمپیوټر او یخچال جوړولو په برخه کې ۳ میاشتې زده کړې ترلاسه کړي دي، چې ټولو فارغ شویو ځوانانو ته د عملي کار لپاره تخنیکي وسایل هم ورکړل شول.
۱۴۴۷/۵/۲۹ هـ ق
