بغلان ولایت ځوانانو ته په بېلابېلو برخو کې ښوونیز ټولګي پیل شول
د بغلان ولایت د اطلاعاتو او کلتور ریاست ځوانانو چارو آمریت د ویناوالۍ، انګلیسي ژبې او کمپیوټر پروګرامونو زده کړو په برخو کې درې میاشتني وړیا ښوونیز ټولګي پیل کړل.
د اطلاعاتو او کلتور ریاست د فرهنګ او ګرځندوی آمر د علم د ارزښت په اړه هر اړخیزې خبرې وکړې او ویې ویل: افغانستان د دیني او عصري علومو پرته نه شي کولای د بریا لوړو څوکو ته ورسېږي.
د فرهنګ او ګرځندوی آمر زیاته کړه، چې په دې ښوونیزو ټولګیو کې به د دې ولایت ۱۵۰ تنه بیوزله ځوانان وړیا زده کړې ترلاسه کړي.
په ورته وخت کې د ویناوالۍ ټولګي یو تن زده کوونکي د اطلاعاتو او کلتور ریاست له دې اقدام څخه هرکلی وکړ او د بغلان ولایت د ولسواليو په کچه د ورته پروګرامونو د جوړولو غوښتنه وکړه.
۱۴۴۷/۳/۴ هـ ق
