سلګونو تنو ځوانانو ته د ویناوالۍ او کمپیوتر وړیا کورسونه پیل شول
د بادغیس ولایت د اطلاعاتو او کلتور ریاست ځوانانو چارو آمریت اړوند ښوونیز مرکز له لوري ۳۰۰ تنو ځوانانو ته د ویناوالۍ او کمپیوتر پروګرامونو په برخه کې وړیا کورسونه پیل شول.
د بادغیس د اطلاعاتو او کلتور رئیس آخندزاده مطیع الله متقي د دغو کورسونو د پیل غوڼدې کې زده کوونکو ته په خطاب وویل: د اطلاعاتو او کلتور ریاست زموږ ټولو ګډ کور دی، د ویاړ ځای دی چې د اسلامي نظام تر چتر لاندې ژوند کوو او شکر ګذاره یو چې د پردیو هېوادونو له ظلمونو او اسارته مو خلاصون پیدا کړ.
همدارنګه ښاغلي متقي زده کوونکو ته سپارښتنه وکړه، چې خپل سیرت او صورت په اسلامي شریعت برابر کړي، نیک اخلاق ولري، په وخت او حاضرۍ سره ټولګي ته مقید او ژمن اوسي او د خپلو استادانو پوره درناوی وکړي.
دغه راز غونډې ته راغلیو ځوانانو د اطلاعاتو او کلتور ریاست څخه مننه وکړه او د دغو کورسونو پیلیدل یې د ځوانانو علمي ظرفیت لوړونه برخه کې مهم وباله.
۱۴۴۷/۲/۲۶ هـ ق
