فاریاب کې د ځوانانو له ښوونيزو مرکزونو، تاریخي آبداتو، سیاحتي شرکتونو او کتابپلورنځیو څخه څارنه وشوه
د فاریاب ولایت د اطلاعاتو او کلتور رئیس مولوي شمسالدین محمدي د یوه پلاوي په مشرۍ د اندخوی، خانچهارباغ، قرغان او قرمقول ولسوالیو ته سفر وکړ او له تاریخي آبداتو، د ځوانانو له ښوونيزو مرکزونو، عامه کتابتونونو، سیاحتي شرکتونو او کتابپلورنځیو څخه يې لیدنه او څارنه وکړه.
مولوي شمس الدين محمدي تاریخي آبدات او آثار د هېواد د ملي هویت نښه وبلله او د هغوی ساتنه او حفاظت یې د ټولو ګډه دنده یاده کړه، نوموړي له سیمه يیزو چارواکو او د سیمې له اوسېدونکو وغوښتل، چې د فرهنګي میراثونو په ساتنه کې هڅې وکړي او د غیرمسؤله کسانو له لوري د هغوی د تخریب مخه ونیسي.
همدارنګه د اطلاعاتو او کلتور رئیس د ښاروالیو د استازو په شتون کې د اصنافو د لوحو، کتابپلورنځیو او سیاحتي شرکتونو څخه هم لیدنه وکړه او د وزارت مقام د لارښوونو پر بنسټ د ممنوعه کتابونو د چاپ او پلور په مخنیوي، په لوحو او اعلاناتو کې د بهرنیو کلمو او اصطلاحاتو پر ځای د ملي کلمو او اصطلاحاتو په کارونې او د سیاحتي شرکتونو پر قانوني فعالیت یې ټینګار وکړ.
پلاوي په اندخوی ولسوالۍ کې د ځوانانو له ښوونيز مرکز څخه چې د اکټید دفتر په مالي ملاتړ او د اطلاعاتو او کلتور ریاست د ځوانانو چارو مدیریت په همکارۍ فعالیت کوي هم لیدنه وکړه او زدهکوونکو ته یې په ديني او عصري علومو کې د زياتو هڅو کولو سپارښتنې وکړې.
۱۴۴۷/۱/۱۶ ھـ ق
