د ګل غونډۍ تفريحي سيمه کې د کتابونو نندارتون جوړ شو
د پروان ولایت د اطلاعاتو او کلتور ریاست له لوري د ګلغنډۍ تفریحي سیمه کې د کتابونو یو ورځنی نندارتون جوړ شو.
پروان ولایت ګلغنډۍ تفریحي سیمه چې د اختر شپو ورځو کې د ۱۰۰ زرو سیلانیانو شاهده وه، او دا مهال هم ګڼ شمېر سيلانیان د تفريح په موخه يادې تفريحي سيمې ته راځي، نو په همدې اساس د اطلاعاتو او کلتور ریاست له لوري د زرګونو کتابونو یو ورځنی نندارتون پکښې جوړ شو.
د اطلاعاتو او کلتور رئیس مولوي شمس الحق صدیقي وویل: د کتاب مطالعه د انسان ذهن پراخوي او په ذهن کي نوي نوښتونه پیدا کوي، نوموړي له هیوادوالو څخه غوښتنه وکړه، چې د ارغوان ګلونو د ښکلاګانو د نندارو ترڅنګ د دې نندارتون څخه په ګټې اخستنې د ټلیفون د استعمال پر ځای کتاب مطالعه کړي، ځکه کتاب مطالعه کول د انسان په ذهن کې مثبت بدلون راولي.
نوموړي د یاد نندارتون موخه پروان کې د کتاب لوستنې کلتور ته وده ورکول وښودل.
۱۵/۱۰/۱۴۴۶ ق
