نیمروز کې د قرآن کریم یو ورځنی نندارتون جوړ شو
د نیمروز ولایت د اطلاعاتو او کلتور ریاست له لورې د زرنج ښار په عامه کتابتون کې د روژې مبارکې میاشتې د فضلیت په موخه د قرآن عظیم الشان یو ورځنی نندارتون جوړ شو.
د اطلاعاتو او کلتور رئيس مفتي حبیبالله الهام وویل: د نندارتون د جوړېدو څخه يې موخه د قرآن عظیم الشان سره اړېکه جوړول او د قرآن کریم زده کړی ته ځانګرې پاملرنه ده.
د ښاغلي الهام په خبره په نندارتون کې د قرآن کریم بېلابېلې نسخې او تفاسیر نندارې ته وړاندې شوي، ترڅو د نیمروز ولس او ځوانان ترې برخمن شي، نوموړي له ګډونوالو وغوښتل، چې د روژې مبارکې میاشتې له فرصت څخه ښه ګټه پورته کړي او تل د قرآن عظیم الشان تلاوت وکړي.
د نیمروز د لوړو زده کړو مؤسسې رئیس مولوي محمد صدیق بني کمال د دا ډول نندارتونونو جوړول د تلاوت په ترويج او د ځوانانو په هڅولو کې اغېزمن وبلل او همداراز يې د الهي کلام سره د اړیکو ټینګولو برخه کې مثبت اقدام یاد کړ.
د نندارتون ګډونوالو د اطلاعاتو او کلتور رياست څخه د جوړ شوي نندارتون په تړاو د مننې ترڅنګ وویل: د قرآن عظیم الشان او ډول _ډول تفاسیرو نندارتونونه جوړول د تلاوت او عامه پوهاوي د ترلاسه کولو له پاره اړين دي، دوى له مسٶلينو څخه غوښتنه وکړه، ترڅو ورته نور نندارتونونه هم جوړ کړي.
۱۴۴۶/۹/۲۰ ق
۱۴۰۳/۱۲/۳۰ ل
