کندهار کې د کتابونو درې ورځنی نندارتون په برياليتوب سره پای ته ورسېد
د کندهار ولايت د اطلاعاتو او کلتور رياست مسؤلين وايي: دې ولايت کې د افغان بيسيم مخابراتي شبکې په ملاتړ د کتاب درې ورځنی نندارتون په برياليتوب سره د زرګونه ټوکو کتابونو په پلورلو سره پای ته ورسېد.
د مسؤلينو په وينا؛ په دې نندارتون کي کتاب رانیونکو ته د قرعه کشۍ له لارې بېلابېلې ډالۍ هم ورکړل شوې، په دې ډاليو کي درې عرادي بایسکل، يوه پایه لیپټاپ کمپیوټر، درې سیټه موبایلونه، ۲۰۰ ګیلاسونه، ۸۰۰ قلمونه، ۳۰ ساعتونه، ۸۰۰ کتابچې او ۱۱۰۰ کتابونه شامل وه.
د کتاب پلورنکو د اتحادیې مشر حکمت الله حکمت وایي: په دې نندارتون کې د ۷۰ کتاب پلورونکو لخوا بېلابېل دیني او عصري کتابونه وپلورل شول، چې زیاته برخه یې معلوماتي کتابونه وو، کتاب پلورونکو په دې نندارتون کې يې د کتاب بيې ته په کتو سره د ۱۰ څخه تر ۳۰ سلنه پورې تخفیف کړی وو.
نوموړي له ځوانانو وغوښتل، چې په ټلیفون او ټولنیزو رسنیو باندې د وخت د ضایع کولو پرځای دې د خپل راتلونکي د ښه والي په موخه د کتابونو مطالعه وکړي.
۱۴۴۶/۸/۷ ق
۱۴۰۳/۱۱/۱۸ ل
