د چشت شریف ولسوالۍ له تاریخي او طبیعي ځایونو څخه لیدنه وشوه
د هرات ولايت د اطلاعاتو او کلتور رياست د ګرځندوى ټيم د هرات ختيځو ولسواليو ته د خپل سفر په دوام د چشت شريف ولسوالۍ له تاريخي ابداتو څخه ليدنه وکړه.
د اطلاعاتو او کلتور رياست د ګرځندوى آمر مولوي رحمت الله محمدي وویل: د دغه سفر په ترڅ کې د چشت شریف ولسوالۍ له ډېرو تاریخي ځایونو څخه لیدنه وشوه، هغه وايي، چې د دغه سفرونو په پيل سره به د هرات د کلتوري شتمنيو د معرفي کولو ترڅنګ د ګرځندوى صنعت ته وده ورکړي.
په دغه سفر کې راغلي ګرځندویان وايي: دغه ډول سفرونه ځوان نسل ته د تاریخي ابداتو د ورپېژندلو لپاره ګټور دي. دوی زیاتوي، چې د کورنیو او بهرنیو سیلانیانو د امنیت په تامین سره کولای شي له بېلابېلو تاریخي او کلتوري ځایونو څخه له اندېښنې پرته لیدنه وکړي.
د يادونې وړ ده، چې دغه سفرونه د ګرځندوى د اوونۍ په مناسبت د ټيکا د دفتر له خوا د هرات ولايت د اطلاعاتو او کلتور رياست د مسوولينو، د هېواد د لوېديځو ولايتونو فرهنګيانو، هنرمندانو او د ګرځندوى د مسوولينو په شتون سره پيل شو.
۱۴۴۶/۴/۲ هـ ق
۱۴۰۳/۷/۱۴ هـ ل