لوګر کې د ساینسي علومو د سیالۍ آزموینه واخېستل شوه

د لوګر ولايت اطلاعاتو او کلتور ریاست او د الفت ښوونیز مرکز په ګډه همکارۍ د يوه خیریه بنسټ په مالي ملاتړ، له ۱۲۰ تنه زده کوونکو او ځوانانو څخه د ساینسي علومو آزموینه واخېستل شوه.
د اطلاعاتو او کلتور رئیس دوکتور رفیع الله صمیم وویل: یاده سیالي په ټولنه کې د مطالعې دود غښتلي کولو او مطالعې طرف ته د ځوانانو د هڅولو په موخه ترسره شوې ده.
د نوموړي په وینا؛ په دغه آزموینه کې د مرکز ترڅنګ له ولسواليو څخه ۱۲۰ تنو زده کوونکو او ځوانانو ګډون کړی وو، نږدې راتلونکي کې به د ولایت په کچه د امام ابو حنیفه (رح) تر عنوان لاندې ستره سیالي هم ترسره شي. 
د یادونې وړ ده، چې د اسلامي امارت له بیا حاکمېدو سره لوګر کې دا ۳۴ مه علمي سیالي ده، چې په سیرت النبي، فکري روزنه، امارت پېژندنه او یو شمېر نورو برخو کې اخېستل کیږي.

۱۴۴۶/۷/۱۴ ق
۱۴۰۳/۱۰/۲۶ ل