سرپل کې د (ټولنیز یووالی، د بریا په لور ګام) په نامه غونډه جوړه شوه
د سرپل ولايت د اطلاعاتو او کلتور رياست مسؤلين وايي: دغه غونډه د اطلاعاتو او کلتور رياست له خوا د افغانستان غږ انستيتوت (TLO) په همکارۍ په دغه ولايت کې د مېشتو بېلابېلو قومونو په شتون سره جوړه شوه، دوی وویل: د دې غونډې اصلي موخه د قومونو ترمنځ د یووالي او همدردۍ پیاوړتیا او د ټولنیز یووالي وده ده.
د اطلاعاتو او کلتور رئیس ملا عبدالغفار حقنما وویل: اسلامي امارت په تېرو درېیو کلونو کې وښوده، چې د بېلابېلو قومونو ترمنځ عدالت او مساوات موجود دی، نوموړي د غونډې له ګډونوالو وغوښتل، چې د اسلامي نظام د پياوړتيا لپاره د خلکو د پيوستون او يووالي لپاره همکاري وکړي.
يو شمېر ګډونوالو په خپلو خبرو کې د يووالي او پيوستون پر اهميت ټينګار وکړ، دوی ټولنیز یووالی د دښمنانو پر وړاندې یو پیاوړی ځواک وباله او ویې ویل: د اسلامي امارت په بریا سره هغه ستونزې او قومي او کورني اختلافات چې له کلونو راهیسې په ټولنه کې موجود وو، پای ته ورسیدل او اوس ټول قومونه په ارامه فضا کې ژوند کوي.
۱۴۴۶/۵/۵/ هـ ق
۱۴۰۳/۸/۱۷ هـ ل
