غزني کې د رسنيو له مسؤلينو او خبريالانو سره د همغږۍ ناسته ترسره شوه
د غزني ولايت په اطلاعاتو او کلتور رياست کې د ياد ریاست د رئيس ملا حميد الله نثار په مشرۍ ددې ولايت د رسنيو له مسؤلينو او خبريالانو سره د همغږۍ ناسته ترسره شوه.
د ناستې په پيل کې د اطلاعاتو او کلتور رئيس ملا حمیدالله نثار اطلاعاتو ته د لاسرسي په اړه معلومات شريک کړل او زياته يې کړه؛ هڅه کوو چې په غزني ولايت کې د دولتي ادارو د نشراتو مسؤلينو ته روزنيز سمينار جوړ کړو، همدا راز په دې ولايت کې د دولتي ادارو او رسنيو ترمنځ د ښې همغږۍ رامنځته کولو لپاره پلان تر لاس لاندې دی.
د اطلاعاتو او کلتور رياست د اطلاعاتو آمر مولوي منصور افغان وويل: د دولتي ادارو د نشراتو مسؤلين دې د خبري راپورونو د خپرولو پر وخت له دقت څخه کار اخلي، پوره او دقيق اطلاعات دې د رسنيو په اختيار کې ورکوي.
ورپسې د ناستې نورو ګډونوالو د رسنيو، خبريالانو او دولتي ادارو ترمنځ په ښې همغږۍ او له رسنيو سره د خبري موضوعاتو په شريکولو ټينګار وکړ او دا ډول ناستې يې مهمې وبللې.
۱۴۴۶/۲/۱۸ هـ ق
۱۴۰۳/۶/۱ هـ ل
