د جام تاريخي او لرغوني منار شاوخوا پاک کاري وشوه
د غور ولايت د اطلاعاتو او کلتور رياست رئيس مولوي عبدالحی زعيم، د ولايت مقام نماينده او د اطلاعاتو او کلتور رياست د تاريخي آبداتو مديريت کارکوونکو له لوري د جام تاريخي منار شاوخوا سيمې چې د وروستيو سيلابونو د پاتې شونو له امله ډکې شوې وې د پاک کارۍ چارو په ترسره کېدو سره د پټۍ په پرې کولو سره پرانستل شوه.
د اطلاعاتو او کلتور رئيس مولوي عبدالحی زعيم وويل: د سيلابونو راوتلو له امله د جام منار شاوخوا سيمې او تر څنګ يې تيريدونکی سيند د سیلابونو د پاتې شونو له امله ډک شوي وو، چې دې نړيوالې لرغونې تاريخي آبدې ته خطر مواجه کړی و، د جام منار اوسني استنادي ديوالونه د منار د محافظت لپاره بسنه نه کوي، د استحکام لپاره يې اړتيا ده چې په شاوخوا سيمو کې يې نور محافظتي کارونه وشي او د سيلابونو مخنيوی پرې وکړي.
د پاک کارۍ چارو د مسؤلې موسسې (BRD) مرستيال نیک محمد سليمي وايي: د پاک کارۍ چارو پروژه د د يونسکو نړيوال سازمان له لوري تمويل شوې وه، د کار موده يې يوه مياشت وه، چې د قرارداد له مادو سره سم پر مخ وړل کيدو، دا مهال د جام منار په شاوخوا ټولو سيمو کې پاک کاري وشوه.
د يادونې وړ ده، چې د اسلامي امارت په حاکميت سره د جام لرغوني منار د ساتنې په برخه کې ارزښتناک کارونه ترسره شوي دي، تېر کال هم د ياد منار د شاوخوا کابین کارۍ او استحکام چارې ترسره شوې وې.
۱۴۴۶/۲/۲ هـ ق
۱۴۰۳/۵/۱۶ هـ ل
