له ثمر فرهنګي دفتر څخه لیدنه وشوه
شنبه ( ۲۹ ذوالحجه ۱۴۴۵ ) د بدخشان ولايت د اطلاعاتو او کلتور رئیس ذبیح الله امیري کوچني پامیر ته د سفر په ترڅ کې د ثمر فرهنګي دفتر له ساحوي مسؤل جمعه ګل پیمان سره وکتل او د ثمر فرهنګي دفتر د فعالیتونو په اړه یې خبرې وکړې، ياد فرهنګي دفتر د واخاني ژبې، ادبیاتو او د هغې د رسم الخط په څیړنیزو څانګو کې د واخان ولسوالۍ په کیپ کوټ کلي کې فعالیت کوي.
د اطلاعاتو او کلتور رئیس ذبیح الله امیري وویل: د ثمر فرهنګي دفتر له اطلاعاتو او کلتور وزارت مقام سره په همغږۍ د واخاني ژبې افسانوي کتابونو، د ماشومانو کتابونو او د واخاني ژبې رسم الخط ته د ودې ورکولو په ډګر کې فعالیت او کار کوي.
د فرهنګ او هنر آمر محمد عارف فاروقي وايي: د ثمر موسسې چارې له لسو کلونو راهیسې د اطلاعاتو او کلتور وزارت د مقام په ھمغږۍ روانې دي او د واخان د کليو په کچه د خلکو فرهنګ ته د ودې ورکولو لپاره د واخاني ژبې د کلمو د راټولولو او جوړولو په اړه پراخې څېړنې کوي.
د یاد دفتر ساحوی مسؤل جمعه ګل پیمان وویل: د اصلي کلتورونو د څیړنې په څانګه کې د ذکر شویو فعالیتونو سربیره يې ماشومانو ته د څو ټولګیو چمتوالی نیولی، ترڅو ماشومان په هڅونې او خلاص ذهن سره اماراتي ښوونځیو ته داخل شي.
۱۴۰۳/۴/۱۷ ھ ش
۲۰۲۴/۷/۷ ميلادي
