د غزني د اطلاعاتو او فرهنګ رئيس: اسلامي امارت د رسنيو ملاتړ ته ژمن دی
یکشنبه (۱۹ د شوال المکرم ۱۴۴۵) د غزني ولايت د اطلاعاتو او فرهنګ د رئيس ملا حميد الله نثار په مشرۍ د رسنيو له مسؤلينو او خبريالانو سره د همغږۍ غونډه ترسره شوه.
د اطلاعاتو او فرهنګ رئيس ملا حميد الله نثار په اوسني وخت کې رسنۍ د خلکو او حکومت د ژبې په حیث وبللې او زياته يې کړه؛ اسلامي امارت د رسنيو ملاتړ ته ژمن دی، رسنۍ باید د اسلامي شريعت او افغاني فرهنګ سره سم خپلو فعاليتونو ته ادامه ورکړي او د هېواد ملي ګټې په پام کې ونيسي.
نوموړي زياته کړه؛ غربي رسنۍ هره ورځ د افغانستان د ملي ګټو پرضد فعاليتونه ترسره کوي، چې ډېر مهم موضوعات يې په هېواد کې قومي او سمتي موضوعاتو ته لمن وهل وي.
د خبريالانو په استازولۍ د غزني د خبريالانو د اتحاديې رئيس ګلاب الدين اميري وويل: اسلامي او ملي ګټې د رسنيو او خبريالانو په کاري لومړيتوبونو کې دي او هڅه کوي چې خپلې ټولې چارې د هېواد له نافذه قوانينو سره سمې ترسره کړي.
۲۰۲۴/۴/۲۸ میلادي
۱۴۰۳/۲/۹ هــ ل
