هلمند کې له خبریالانو سره میاشتنۍ ناسته تر سره شوه
د هلمند ولایت اطلاعاتو او کلتور ریاست کې ددې ریاست د مرستیال مولوي محمدقاسم ریاض په مشرۍ د هلمند مېشتو خبریالانو سره د همغږۍ میاشتنۍ ناسته تر سره شوه، چې پکې خبریالانو خپلې ستونزې او غوښتنې د حل په موخه د اطلاعاتو او کلتور ریاست له مسؤلینو سره شریکې کړې. دوی وویل: د اسلامي امارت دبشپړ حاکمیت وروسته هلمند کې اطلاعاتو ته لاسرسی زیات شوی او د خبریالانو د کار ساحه پراخه شوې ده. همداراز یې د اطلاعاتو او کلتور ریاست د همکاریو څخه مننه وکړه او یو شمېر هغه ستونزې او غوښتنې یې هم وړاندې کړې چې وخت په وخت خبریالان ورسره مخامخ کېږي.
ورپسې د اطلاعاتو او کلتور ریاست مرستیال د دوی د غوښتنو او ستونزو تر اورېدلو وروسته ډاډ ورکړ، چي د تل په څېر به د خبریالانو سره خپله همکاري جاري ساتي او ستونزو ته به یې د حل لارې لټوي.
نوموړي رسنۍ د ټولنې او حکومت ترمنځ د ارتباط او اړیکو زیاتولو په برخه کې زیاتې مهمې وګڼلې او ورڅخه یې مننه وکړه چي تل یې په رسنیز ډګر کې خپل رسالت په ښه ډول ترسره کړی دی.
۱۴۴۵/۵/۷ هـ ق
۱۴۰۲/۸/۳۰ هـ ش
