په لوګر کې د هېواد د خپلواکۍ ١٠٤ کليزه ولمانځل شوه
تېره ورځ په لوګر ولایت کې د هېواد د خپلواکۍ ١٠٤ کليزه ولمانځل شوه، په دې اړه جوړه شوې غونډه کې د لوګر ولایت مرستیال والي الحاج مولوي عنایتالله شجاع، د پکتیا مرستیال والي الحاج مولوي انعامالله صلاحالدین، د لوګر ولایت یو شمیر علماوو، د ملکي او نظامي ادارو مسؤلینو ګډون کړی وو.
غونډه د کلامالله مجید د څو مبارکو آیتونو په تلاوت سره پیل شوه.
ورپسې د لوګر مرستیال والي الحاج مولوي عنایتالله شجاع په خپلو خبرو کې د افغانستان ټول مسلمان ملت ته د دې ورځې د رارسیدو له امله مبارکي وویله او د ازادۍ د لارې د شهیدانو روح ته یې د دعا لاسونه لپه کړل.
د لوګر مرستیال والي د اشغالګرو لخوا د هېواد د اشغال په دریو دورو کې د افغانستان د مجاهدینو د بریا په اړه هر اړخیزه معلومات وړاندې کړل او له اشغال څخه یې د هېواد په آزادولو کې د مجاهدینو د سرښندنو او قربانیو ستاینه وکړه.
ورپسې د پکتيا مرستيال والي الحاج مولوي انعامالله صلاحالدين په خپلو خبرو کې وويل: الله تعالی افغانانو ته د اشغالګرو پر وړاندې د فتحې وياړ ورکړ او هغه هېوادونه چې ځانونه يې د وخت فرعونان بلل، د افغانانو په لاس مات شول.
ښاغلي صلاح الدین د اشغال په دريو پړاوونو کې د مجاهدينو د تاريخي وياړونو په اړه مفصلې خبرې وکړی او هم يې ټولو مجاهدينو او مسلمانانو ته د دې ورځې مبارکي وويله.
۱۴۴۵/۲/۲ هـ ق
۱۴۰۲/۵/۲۸ هـ ش
