د کتابونو ارزونې کمېسیون نوبتي غونډه ترسره شوه
نن دوشنبه(۱۴۴۴/١٢/٢٢ هـ ق) اطلاعاتو او کلتور وزارت کې د کتابونو د ارزونې کمېسیون نوبتي غونډه د بشري سرچینو رئيس مولوي عبدالحق حماد په مشرۍ ترسره شوه، چې پکې د دغه وزارت د دولتي ورځپاڼو رئیس مولوي محمد ابراهیم نبیل، دبیهقي کتاب خپرولو ریاست رئیس عبدالعلیم ځانواک مفتي زاده، د لوړو زده کړو وزارت استازي احمد تقي، د دعوت او ارشاد، د معارف وزارت، د علومو اکاډمۍ، د حج او اوقافو، د امر بالمعروف، د افغانستان د ناشرانو ټولنې استازو او د کمېسيون نورو غړو ګډون کړی وو.
غونډه د قرآن کريم په مبارکو آياتونو پیل شوه، ورپسې د بشري سرچینو رئيس عبدالحق حماد د یاد کمېسيون کړنې مثبتې وارزولې او د یاد کمېسيون فعاليتونه يې وستايل.
په یاده غونډه کې د ٥٠ ټوکه بېلابېلو کتابونو ارزونه وشوه، کوم چې د اسلامي ارزښتونو او افغاني عنعناتو سره سم وو، د نشر اجازه ورکړل شوه.
همدارنګه د غونډې په وروستۍ برخه کې د کتاب ارزونې کمېسیون پر لوګو جوړولو هم خبرې وشوې.
