د فېروز کوه موسسې مشرې د هنر او کلتور مرستيال سره وکتل
نن چهارشنبه (۱۴۴۴/۱۱/۲۵ هـ ق) د فېروز کوه موسسې مشرې شاشانه ستيورت د اطلاعاتو او کلتور وزارت د هنر او کلتور مرستيال مولوي عتيق الله عزيزي سره د نوموړي په کاري دفتر کې د يادې موسسې د فعاليتونو او پلانونو په اړه وکتل.
د ليدنې پرمهال د فېروز کوه موسسې مشرې د خپلو پلانونو او فعاليتونو په اړه معلومات شريک کړل او په باميانو ولايت کې د تاريخي کاروان سرای د بیا جوړولو پروړاندې د شته ستونزو يادونه يې وکړه، همداراز نوموړې د هنرستان رياست د اړتياوو په پوره کولو کې د لازمو مرستو ډاډ ورکړ.
د هنر او کلتور مرستيال مولوي عتیق الله عزیزي د فیروز کوه موسسې د فعالیوتونو او پلانونو ارزونې تر څنګ نوموړې ته لازمې مشورې ورکړې او زیاته یې کړه چې د کاروان سرای د جوړیدو پر مخ د شته ستونزو د حل په برخه کې به په لنډو ورځو کې لازم او جدي اقدامات ترسره شي.
د يادونې وړ ده چې فیروز کوه یوه تعليمي او نادولتي موسسه ده چې د هېواد د ښکلي هنرونو د بډایه کولو په برخه کې کار کوي.
۱۴۴۴/۱۱/۲۵ هـ ق
۱۴۰۲/۳/۲۴ هـ ش
