د اطلاعاتو او کلتور سرپرست د غزني له یوشمېر تاریخي آبداتو څخه لیدنه وکړه
تېره ورځ د اطلاعاتو او کلتور محترم وزیر ملا خیرالله خیرخواه غزني ولایت ته د خپل سفر په ترڅ کې د غزني ولایت د اطلاعاتو او کلتور ریاست د رئیس په ملتیا د غزني ولایت له یوشمېر تاریخي آبداتو څخه لیدنه وکړه، چې له جملې یې د حکیم سنائي مقبره، د بابا جي تاریخي مسجد، د غزني د بالاحصار، د بهلول ابدال مقبره، د سید محمدشریف خان تاریخي مقبره، د غزني دوه تاریخي منارونه، د سلطان ابراهیم شاه مقبره، او د سلطان سبکتګین تاریخي مقبره وه.
ښاغلي وزیر له یادو تاریخي ځایونو څخه د لیدنې پر مهال وویل چې تاریخي آبدات او تاریخي آثار د ملت معنوي شتمني ده، ساتل او رغول یې د دولت او ملت ګډ مسؤلیت دی.
نوموړي په خپلو خبرو کې وویل، د نوي کال په بودیجه کې د غزني ولایت د هغه تاریخې آبداتو رغول په پام کې نیول شوي دي، کوم چې په تېر کې له کاره لوېدلي دي.
۱۴۴۴/۱۰/۱۵ هـ ق
۱۴۰۲/۲/۱۵ هـ ش
