د ننګرهار د اطلاعاتو او کلتور رئیس د پچیر اګام او سپین غر ځوانانو ټولنو له غړو سره لیدنه وکړه
د ننګرهار د اطلاعاتو او کلتور رئیس مولوي نورمحمد حنیف او د ځوانانو چارو آمر محمد اصف زهیر د پچیراګام ولسوالۍ د ځوانانو شورا او سپین غر ځوانانو ټولنې یو شمېر غړو سره د یاد ریاست په انګړ کې وکتل.
د پچیر اګام ولسوالۍ د ځوانانو شورا مرستیال احسان الله پاڅون پر خپلو فعالیتونو رڼا واچوله او یادونه یې وکړه، چې یاده شورا د لسو کالو راهیسې د سیکارام په نوم ادبي مشاعره جوړوي او سږ کال هم هوډ لري چې د کوچني اختر په شپو او ورځو کې یوه مشاعره ترتیب کړي.
د ننګرهار د اطلاعاتو او کلتور رئيس مولوي نور محمد حنیف د یادو ځوانانو له ادبي هڅو او فرهنګي فعالیتونو ستاینه وکړه او ځوانانو ته یې سپارښتنه وکړه، چې د خپل هېواد د بیارغونې په موخه دې د اسلامي ارشاداتو په رڼا کې د خپل اصلي افغاني کلتور د لا پیاوړتیا لپاره کوښښ وکړي.
هېره دې نه وي چې دغه ناسته کې د ننګرهار د اطلاعاتو او کلتور ریاست د فرهنګ امر سید امر الله امید او څو تنو نورو مسوولینو هم ځوانانو ته د چارو د ښه ترسراوي په موخه سپارښتنې وکړې.
۱۴۴۴/۹/۱۸ هـ ق
۱۴۰۲/۱/۲۰ هـ ش
