د زمري۲۴مې د نمانځنې کمیټې مسؤلینو د هېواد د صنعت، سوداګرۍ او زراعت د بېلابېلو خونو له استازو سره د همغږۍ ناسته وکړه
سهشنبه (د ۱۴۴۸ د صفرالمظفر ۲۰مه)، د زمري ۲۴مې د (فتحې ورځې) د نمانځنې کمیټې مسؤلینو د صنعت او سوداګرۍ وزارت د غونډو په تالار کې د هېواد د صنعت، سوداګرۍ او زراعت د بېلابېلو خونو له استازو سره د همغږۍ ناسته وکړه، چې په دې ناسته کې د اطلاعاتو او فرهنګ وزارت د خپرونو چارو معین ښاغلي مهاجر فراهي، د صنعت او سوداګرۍ وزارت اړوند د صنعت چارو معین مولوي احمدالله زاهد، د اسلامي امارت مرستیال ویاند مولوي حمدالله فطرت او د یو شمېر امارتي ادارو مسؤلینو هم ګډون کړی و.
د صنعت او سوداګرۍ وزارت اړوند د صنعت چارو معین مولوي احمدالله زاهد د غونډې ګډونوالو ته ښه راغلاست ویلو ترڅنګ وویل: د زمري ۲۴مه د فتحې ورځ د ټولو افغانانو ګډ ویاړ دی او د دې ورځې د ښه نمانځلو په برخه کې د خصوصي سکتور همکارۍ مهمه ده.
دغه راز د خپرونو چارو معین ښاغلي مهاجر فراهي د زمري ۲۴مې نمانځل د ټولو ګډ مسؤلیت وباله او ویې ویل: اسلامي امارت په تېرو پنځو کلونو کې په بېلابېلو برخو کې مهمې لاسته رواړنې لري. د ښاغلي فراهي په وینا؛ د فتحې ورځې د ښه نمانځلو په موخه د ټولو همکارۍ مهمه ده او د دې ورځې نمانځل د اسلامي نظام او هېواد دښمنانو ته پیغام ورکوي چې افغانان د ډېرو ستونزو او مشکلاتو وروسته بیا هم د یو مرکزي حکومت تر چتر لاندې په ارامه فضاء کې ژوند کوي او د هېواد د پرمختګ په برخه کې نه ستړي کیدونکې هلې ځلې کوي.
د غونډې په لړ کې د اسلامي امارت مرستیال ویاند مولوي حمدالله فطرت د یادې غونډې جوړیدو موخې په اړه خبرې وکړې او ویې ویل: د هېواد تاریخ له لاسته راوړنو څخه ډک دی، چې یو هم د زمري۲۴مې ورځ دی او د دې ورځې نمانځل یې دټولو ګډ مسؤلیت دی.
د ښاغلي فطرت په وینا؛ په تېرو پنځو کلونو کې په بېلابېلو برخو کې د لویو لاسته راوړنو شاهدان یو، چې یو هم خصوصي سکتور دی او خصوصي سکتور پرمختیا ته اړوندو ادارو اړینې اسانتیاوې هم برابرې کړي دي، ښاغلي فطرت هیله څرګنده کړه، چې د یادې ورځې د نمانځلو د بېلابېلو پروګرامونو د جوړولو په برخه کې دې خصوصي سکتور پوره همکارۍ وکړي.
د غونډې په پاې کې د بېلابېلو خونو استازو هم خبرې وکړې او ویې ویل: د زمري۲۴مې نمانځل زموږ د ټولو ګډ ایماني او ملي مسؤلیت دی او ټول به د یادې ورځې د ښه نمانځلو په برخه کې پوره همکارۍ وکړو.
