د کتاب نړیوالې اوونۍ په مناسبت بغلان کې د کتاب یو ورځنی نندارتون جوړ شو
د بغلان اطلاعاتو او فرهنګ ریاست د پوهنې ریاست په همغږۍ، د کتاب نړیوالې اوونۍ په مناسبت په پلخمري ښار کې د کتاب یو ورځنی نندارتون جوړ کړ.
د اطلاعاتو او فرهنګ ریاست اړوند د عامه کتابتونونو مدیر وویل: دغه نندارتون د فرهنګیانو، قلموالو، استادانو او د لسګونو ښوونځیو زدهکوونکو په ګډون پلخمري ښار کې ترسره شو.
د نوموړي په وینا، په دې پروګرام کې د اطلاعاتو او فرهنګ ریاست د فرهنګ او ګرځندوی آمر د مطالعې او کتاب لوستلو د ارزښت او اهمیت په اړه خبرې وکړې او له زدهکوونکو څخه یې وغوښتل چې د درسي مضامینو ترڅنګ د نورو کتابونو مطالعې ته هم پاملرنه وکړي، ترڅو یې د معلوماتو کچه لوړه شي.
دغه راز د بغلان د فرهنګپالانو له ډلې یو تن د دې پروګرام د جوړېدو ستاینه وکړه او د ولایت په کچه یې د ورته پروګرامونو د دوام غوښتنه وکړه.
د یادونې وړ ده، چې د پلخمري د عامه کتابتون ترڅنګ، د بغلان ولایت په څلورو ولسوالیو کې هم عامه کتابتونونه فعال دي او هره ورځ لسګونه کسان د مطالعې په موخه ورته مراجعه کوي.
۱۴۴۷/۱۱/۸ هـ ق
