لسګونو تنو ځوانانو ته د مطالعې دود عامولو په موخه روزنیز سیمینار وړاندې شو

د اطلاعاتو او کلتور وزارت اړوند د عامه کتابتونونو ریاست او د بغلان اطلاعاتو او کلتور ریاست په ګډو همکاریو بغلان کې لسګونو تنو ځوانانو ته د مطالعې دود عامولو په موخه روزنیز سیمینار وړاندې شو.
د بغلان اطلاعاتو او کلتور رئیس مولوي اسدالله مصطفی هاشمي د دغه روزنیز سیمینار موخه په ټولنه کې په ځانګړي ډول د ځوان قشر ترمنځ د مطالعې دود عامول او پیاوړتیا یاده کړه او پر ځوانانو یې غږ وکړ، چې د مطالعې کلتور د عامولو او پراختیا په برخه کې له شته فرصتونو څخه بشپړه ګټه واخلي.
د سیمینار په لړ کې د عامه کتابونونو رئیس دوکتور رفیع الله صمیم کتاب او مطالعه د ورځني ژوند پرمختګ په برخه کې بنسټیزه اړتیا یاده کړه او زیاته یې کړه، چې زموږ مخکینیو علماوو او اسلافو کتاب او مطالعې ته په ژوند کې ځانګړی وخت ورکړی و، موږ ته په کار ده، چې د هغوی په پل قدم  کېږدو، کتاب د ژوند ملګری کړو او د علم ترلاسه کولو لاره کې هر ډول تکلیف وګالو.
دغه راز د بغلان پوهنتون یو تن استاد پوهندوی عبدالخالق نوري د مطالعې کولو اصولو، لارو چارو او ګټو په اړه هراړخیزې خبرې وکړې او مطالعه یې د ژوند مهمه برخه وبلله، ښاغلي نوري له ځوانانو څخه وغوښتل چې کتاب او مطالعې ته ځانګړی وخت ورکړي او د مطالعې په وسیلې په ټولنه کې علمي انقلاب او بدلون راولي.

۱۴۴۷/۱۱/۵ هـ ق