کاپیسا کې ۱۱ تاریخي، لرغونې او سیاحتي سیمې کشف شوې

د کاپیسا د اطلاعاتو او کلتور د مسؤلينو په وينا؛ چې د اطلاعاتو او کلتور ریاست د پلاوي له لوري د دې ولایت د نجراب ولسوالۍ د لرغونو سیمو د لیدنې پر مهال بېلابېلو درو کې د (زندان خانه، بومبري استوپه، آدم خان غنډۍ، بانو چینه غونډۍ او چهل قلبه استوپه) په نوم پنځه لرغونې سیمې کشف کړې دي، چې په دغو سیمو کې د پخوانیو ډبرینو دیوالونو او د بودیزم دورې اړوند د خټو ټوټې (سفالي توکي) موندل شوي دي.
د مسؤلينو په وینا؛ څلور تاریخي آبدې هم کشف شوې دي چې پکې د پیر حاضر بابا زیارت، بارزه‌يي بابا، بابا سنګین ولي او صوفي داد محمد ولي شامل دي، چې له درې سوه تر څلور سوه کلونو پورې تاریخي مخینې لري، همدارنګه، دوه طبیعي او سیاحتي سیمې چې یو طبیعي کاریز او یو تاریخي برج (وته پور) گیاوه دی، هم د دغو لیدنو پر مهال کشف او د دې ریاست په ډیټابېس کې ثبت شوې دي.
لرغونې سیمې تاریخي خاموشې خزانه بلل کېږي، چې د خاورې له تل څخه د پخوانیو تمدنونو رازونه را برسېره کوي او د زړو آثارو او پاتې شونو په لرلو سره د یو ملت کلتوري او تاریخي هویت څرګندوي.

۱۴۴۷/۱۰/۲۷ هـ ق