د لوحو او تبلیغاتي تابلوګانو د اصلاح کمېسيون نوبتي غونډه وشوه
د اطلاعاتو او کلتور وزارت د خپرونو چارو معين ښاغلي مهاجر فراهي په مشرۍ د لوحو او تبلیغاتي تابلوګانو د اصلاح کمېسيون نوبتي غونډه وشوه.
په پیل کې د کمېسیون منشي د تېرو پرېکړو په اړه معلومات وړاندې کړل.
د دې ناستې د پرېکړو پر بنسټ موندل شوې بدیلې کلمې او اصطلاحات د عملي کولو په موخه د اطلاعاتو او کلتور ریاستونو، د کابل فرهنګي ښاروالۍ ریاست، هټۍ لرونکو او د کسب کارانو خونو سره شریک کېږي.
همداراز پرېکړه وشوه، چې د لوحو د ارزونې او بیاکتنې بشپړ راپور دې د کابل ښاروالۍ له لوري ترتیب او د وروستۍ پرېکړې لپاره چمتو شي.
د غونډې په لړ کې ټینګار وشو، چې د کمېسیون راتلونکی پروګرام به د کابل ښار په دوهمه ناحیه کې پلي شي او د کلني راپور د ترتیبولو په موخه به د ولایتي کمېټو راپورونه هم راټول شي.
مسوولینو د دې غونډې د جوړېدو څخه موخې د لوحو د اصلاح په بهیر کې لا زیات همغږي رامنځته کول او د ښاري اعلانونو د وضعیت ښه والی وباله.
۱۴۴۷/۹/۱ هـ ق
