د مطالعې او کتاب لوستلو دود د پیاوړتیا هڅې دوام لري
د پنجشیر ولایت د اطلاعاتو او کلتور ریاست اړوند د عامه کتابتون مدیریت له لوري د بازارک ښار لسګونو تنو ځوانانو ته د مطالعې او کتاب لوستلو د ارزښت په اړه د عامه پوهاوي پروګرام ترسره شو.
مسؤلینو وویل: دغه هڅې د اطلاعاتو او کلتور ریاست له لوري د کتاب د اهمیت او د ځوانانو د علمي ظرفیت لوړولو په برخه کې د مطالعې د ارزښت په اړه د دوامداره پروګرامونو جوړولو له لارې دوام لري.
مسؤلینو کتاب او مطالعه د بشري ټولنې نه بېلېدونکې برخه وبلله او ټینګار یې وکړ، چې کتاب د انسان، په ځانګړي ډول د ځوان نسل تر ټولو نږدې او غوره ملګری دی.
دوی زیاته کړه، چې دا ډول د عامه پوهاوي پروګرامونه به د مطالعې او کتاب لوستلو د کلتور د پراختیا په موخه د پنجشیر ولایت په مرکز او ولسوالیو کې په دوامداره توګه جوړ شي.
۱۴۴۷/۷/۲۱ هـ ق
