لسکونو تنو ځوانانو ته د موزیم پیژندنې په موخه روزنیز سیمینار وړاندې شو

د پروان ولایت د اطلاعاتو او کلتور ریاست اړوند د موزیم عمومي مدیریت له لوري لسګونو تنو ځوانانو ته د موزیم پيژندنې په موخه روزنیز سیمینار وړاندې شو.
د اطلاعاتو او کلتور رئیس مولوي شمس الحق صدیقي د انسان په ژوند کې د موزیم په اهمیت خبرې وکړې او ویې ویل: موزیم کې شته آثار د ملتونو هویت، تاریخ او فرهنګ بیانوي، نو اړینه ده؛ چې زموږ ځوانان د خپل هویت، فرهنګ او تاریخ په اړه پوهه ولري.
د اطلاعاتو او کلتور ریاست اړوند موزیم عمومي مدیر وویل: دغه یو ورځنی روزنیز سیمینار د تېرو کلونو څخه پاتې تاریخي آثارو د ارزښت او اهمیت د پیژندلو په موخه جوړ شوی او د اطلاعاتو او کلتور ریاست هڅې کوي، چې د دې ولایت ځوانان د موزیم د آثارو، د ساتنې او پالنې په اهمیت لا ښه وپوهوي.
د موزیم عمومي مدیر زیاته کړه، اوس مهال په یاد موزیم کې د اسلامي تمدن، کوشانیانو او بوداییانو له دورو څخه پاتې له سل قلمو څخه زیات لرغوني آثار موجود دي.
په ورته وخت کې ګډونوالو د دې سیمینار ترسره کول د ځوانانو د پوهې د کچې د لوړوالي لپاره مهم وبلل او غوښتنه یې وکړه، چې ورته روزنیز پروګرامونو جوړول دې دوام ومومي.
۱۴۴۷/۶/۲۶ هـ ق