د ننګرهار ولایت موزیم ته لسګونه لرغونې سکې ولېږدول شول
د اطلاعاتو او کلتور وزارت د فرهنګ او هنر معینیت اړوند لرغون پیژندنې ریاست له لوري ۴۲ لرغونې سکې چې له جملې یې یوه د سپینو زرو او پاتې نور له مسو څخه جوړې شوې دي او د تیرو کلونو په لړ کې د ننګرهار ولایت سبز آباد غونډی لرغونې سیمې څخه لاسته راغلې دي، د مسلکي هیات له لوري نندارې ته وړاندې کولو په موخه له پاک کاري، وقایې، تشخیص او ثبت وروسته د ننګرهار ولایت موزیم ته ولېږدول شول.
یادې سکې د میلاد څخه وړاندې دریمې پېړۍ څخه تر شپږمې میلادي پېړۍ (هندو سکایي، یونان او باختر، هند او پارتي، کوشاني او ساساني-کوشاني دورو) پورې تړاو لري.
د لرغون پیژندنې رئیس سید ذبیح الله سادات وویل: لرغونې آثار په ځانګړې توګه سکې د حکومت او خلکو تاریخي، سیاسي، فرهنګي، اقتصادي، او ټولنیز هویت نښه ده، چې له پخوانیو دورو څخه موږ ته پاتې شوي دي او د لرغون پېژندنې ریاست مسلکي کارکوونکي د اسلامي امارت د اصولو او تګلارو مطابق علمي او مسلکي فعالیتونو ته ژمن دي، ترڅو د هېواد د بډایه تمدن د لا ښې پېژندنې غوره زمینه برابره کړي.
۱۴۴۷/۶/۱۵ ه ق
