د سیاحتي شرکتونو جوازونه به له دې وروسته برېښنایي بڼه خپله کړي

د اطلاعاتو او کلتور وزارت د ګرځندوی، مالي او اداري چارو معین مولوي قدرت ‌الله جمال هرات ولایت کې د یو شمېر سیاحتي، زیارتي، درماني او آنلاین خدمتونو د شرکتونو له مسؤلینو سره ولیدل.
ښاغلي جمال د سیاحتي شرکتونو لپاره د آسانتیاوو د رامنځته کولو خبره وکړه او ویې ویل: ډېر ژر به د سیاحتي شرکتونو جوازونه په معیاري، ډیجیټلي بڼه او له نوې طرحې سره ووېشل شي، فعال شرکتونه به وکولای شي، چې له یوه جواز سره څو نمایندګۍ پرانیزي.
نوموړي زیاته کړه؛ د هېواد په پولو او هوایي میدانونو کې به ځانګړی ډیټابیس جوړ شي، چې دا پروګرام د ګرځندویانو د سفرونو د اسانتیا او د هغوی د امنیت د تامین په موخه تطبیقیږي.
بل لور ته د سیاحتي شرکتونو مسؤلینو د اوسنیو ننګونو تر څنګ د اطلاعاتو او کلتور وزارت د نوې تګلارې هرکلی وکړ او د پوره همکارۍ ډاډ یې ورکړ.
دوې وايي: د جوازونو د معیاري او ډیجیټل کولو لپاره د وزارت نوې طرحه یو مهم ګام دی، چې هم شفافیت رامنځته کوي او هم شرکتونه پیاوړي کوي، له دې بهیر څخه ملاتړ کوو او هر اړخیزې همکارۍ ته چمتو یو.

۱۴۴۷/۲/۶ هـ ق