د کتاب ارزونې کمېسیون نوبتي غونډه جوړه شوه
دوشنبه ( د ۱۴۴۷ محرم الحرام ۱۸مه) د اطلاعاتو او کلتور وزارت د خپرونو چارو د معین ښاغلي مهاجر فراهي په مشرۍ د کتاب ارزونې کمېسیون نوبتي غونډه د کمېسیون د نورو غړو په شتون کې جوړه شوه.
د غونډې په پيل کې د کمېسیون د تېرې غونډې راپور وړاندې شو او د کمېسيون لاسته راوړنې او فعالیتونه وارزول شول.
په غونډه کې د بېلابېلو کتابونو په اړه لازمې پرېکړې وشوې او هغه کتابونه چې د اسلامي او افغاني ارزښتونو سر سم لیکل شوي وو، د چاپ اجازه یې ترلاسه کړه.
همداراز د خپرندویانو لپاره د ځای ټاکلو، د کتاب د چاپ په برخه کې له خپرندویو ادارو او مطبعو سره همغږۍ او د کتاب د چاپ مالیې د معافیت په اړه د عالیقدر امیرالمؤمنین حفظهالله تعالی د فرمان په اړه هم خبرې وشوې.
د غونډې په پای کې هغه شمېر کتابونه چې کمېسیون ته د ارزونې په موخه رالېږل شوي وو، د ارزونې لپاره د کمېسیون غړو ته وسپارل شول، تر څو راتلونکې غونډې ته يې راپور وړاندې کړي.
