زابل او هلمند ولايتونو کې سيمه ییزو خبریالانو ته پنځه ورځني ښوونيز سمينارونه جوړ شول

دزابل او هلمند ولايتونو د اطلاعاتو او کلتور ریاستونو په هڅو د خبريالانو د خونديتوب کميټې له لوري د سیمه ییزو رسنيو خبريالانو ته د ظرفیت لوړونې پنځه ورځني سمينارونه جوړونه شول.
په زابل کې د افغان خبریالانو د خوندیتوب ټولنې ولایتي مسؤل عصمت الله عمري وویل: په دې پنځه ورځني سمینار کې د مرکز قلات او شاه جوۍ ولسوالۍ د غږیزو او انځوریزو رسنیو لسو تنو خبریالانو ګډون کړی، چې د سمينار پرمهال به ګډونوال د څیړنیز راپور لیکلو او ګرځنده ژورنالیزم په اړه هر اړخیز معلومات تر لاسه کړي.
د زابل د اطلاعاتو او کلتور رئیس مولوي رحمت الله حماد د سیمه ییزو خبریالانو د ظرفیت لوړونې لپاره پیل شوی سیمینار مهم بولي او زیاتوي، هڅه کوي، چې خبريالانو ته لا ډیر روزنیز سمينارونه او ورکشاپونه جوړ کړي.
همدا راز د هلمند ولایت د اطلاعاتو او کلتور رياست د اطلاعاتو آمر د سمينار په اړه وویل: د هلمند ولایت د خبریالانو لپاره پیل شوی پنځه ورځنی سمینار زیات ګټور دی او هڅه کوو، چې خبریالانو ته د ظرفیت لوړونې نور سمینارونه هم جوړ کړو، ترڅو يې کارونه لا منظم او مسلکي شي.
د هلمند او زابل ولايتونو سيمه ییزو خبریالانو د سمینارونو جوړېدو په اړه خوښي وښوده او ويې ویل: په دې ښوونيز سمینار کې داسې معلومات ځای پر ځای شوي، چې په اړه یې وړاندي معلومات نه درلودل، یاد سمينارونه د ظرفیت لوړونې لپاره خورا مهم دي او تمه لري، چې د اطلاعاتو او کلتور ریاستونه ورته نور ښوونيز سمینارونه هم برابر کړي.

۱۴۴۶/۱۲/۴ هـ ق