د هنر او کلتور معین د کابل بالاحصار له روانو رغنیزو چارو لیدنه وکړه

د اطلاعاتو او کلتور وزارت د هنر او کلتور معین مولوي عتیق‌الله عزیزي، د ملي دفاع وزارت مرستیال او د اړوندو وزارتونو د فرهنګي او تخنیکي پلاوي په ملتیا د کابل لرغوني بالاحصار له روانو رغنیزو چارو څخه لیدنه او څارنه وکړه.
په دې لیدنه کې د هنر او کلتور معین او د دفاع وزارت مرستیال د بالاحصار د برجونو، دیوالونو، پوځي ګودامونو او خونو د روانو رغنیزو چارو ارزونه وکړه او ټینګار یې وکړ چې دواړه وزارتونه به د بالاحصار تاریخي ارزښت او کلتوري افتخاراتو ساتنې ته ځانګړې پاملرنه کوي؛ دوی ژمنه وکړه چې د رغنیزو چارو پر وړاندې به خنډونه پر وخت له منځه وړي او په دې برخه کې به بېړني اقدامات ترسره کړي.

همدارنګه د بالاحصار په لمنه کې د جوړ شوي فرهنګي او معلوماتي مرکز چې د بالاحصار څو زره کلن تاریخي، جنګي او فرهنګي آثار پکې خوندي دي، د یاد مرکز د لاپراختیا په موخه پر یو لړ تصامیمو غور وشو.
په پای کې د اطلاعاتو او کلتور وزارت د هنر او کلتور معین او د ملي دفاع وزارت مرستیال ژمنه وکړه چې له کابل ښاروالۍ سره په همغږۍ به د بالاحصار اړوند غصب شوي برجونه او تاریخي سیمې بېرته را وګرځوي.

۱۴۴۶/ ۱۰/۲۲ هـ . ق