د سرپل عامه کتابتون ته سلګونه ټوکه کتابونه ورکړل شول
د اطلاعاتو او کلتور وزارت د عامه کتابتونونو ریاست د سرپل ولایت د اطلاعاتو او کلتور ریاست عامه کتابتون ته ۵۳۵ ټوکه بېلابېل کتابونه ورکړل.
د سرپل د اطلاعاتو او کلتور رئیس ملا عبدالغفار حقنما وویل: د دې ریاست عامه کتابتون د ځوانانو او د کتاب مینوالو لپاره خلاص دی، تر څو له علمي او کلتوري منابعو څخه ګټه واخلي.
نوموړي ټینګار وکړ، چې مطالعه د ځوانانو د فکري او علمي ودې سبب کېږي او د ټولنې د پرمختګ لپاره مهم رول لري.
د اطلاعاتو او کلتور ریاست د کلتور او ګرځندوی آمر وویل: دغه کتابونه د مطالعې کلتور د پیاوړتیا او د ځوانانو د علمي سویې د لوړولو په موخه دې ولایت ته لېږل شوي دي.
په ورته وخت کې د سرپل د والي د دفتر رئیس مولوي سلیمان وهاج د دې اقدام ستاینه وکړه او ځوانان یې د علم زده کړې او کلتوري پراختیا په برخه کې خپلو مسؤولیتونو ته متوجه کړل، نوموړي له ځوانانو وغوښتل، چې له دې فرصت څخه د خپلې پوهې د زیاتوالي لپاره ګټه واخلي.
۱۴۴۶/۹/۲۵ ل
۱۴۰۴/۱/۵ ل
