د روژې مبارکې میاشتې ته ځانګړی د کتاب نندارتون په هرات کې جوړ شو
د هرات ولایت د اطلاعاتو او کلتور ریاست په همږغۍ او همکارۍ یو تن کتاب پلورونکي د روژې مبارکې میاشتې په مناسبت ځانګړی د کتاب نندارتون جوړ کړ.
د هرات د اطلاعاتو او کلتور ریاست د هنر او کلتور آمر د دې نندارتون ملاتړ وکړ او هیله یې وکړه، چې د سړک غاړې کتاب نندارتونونه که په دوامداره ډول جوړ شي، کولای شي د مطالعې کلتور ته وده ورکړي.
د یاد نندارتون جوړوونکی وایي: هڅه کوي چې د مطالعې دود عامولو او د خلکو کتاب ته د لاسرسي د زیاتولو په موخه هره میاشت د ښار په ګڼې ګوڼې سیمو کې د سړک غاړې نندارتونونه جوړ کړي.
نوموړی زیاتوي؛ په دې نندارتون کې یې درې زره ټوکه کتابونه چې دیني، تاریخي، ادبي او د ټولنیزو علومو موضوعات رانغاړي، په تخفیف سره نندارې ته وړاندې کړي دي، تر څو خلک په روژه کې مطالعې ته وهڅول شي.
له بلې خوا د ښار اوسېدونکي او فرهنګيان د دا ډول نندارتونونو جوړېدل د کتاب لوستنې د دود عامولو په برخه کې یو مثبت ګام بولي.
۱۴۴۶/۹/۹ ق
۱۴۰۳/۱۲/۱۹ ل
