د اطلاعاتو او کلتور وزارت وزیر د ناروې هیواد له شارژدافیر البرټ الساس سره وکتل
پنجشنبه (۱۴ د شعبان ۱۴۴۶) د اطلاعاتو او کلتور وزارت وزیر محترم الحاج ملا خیرالله خیرخواه په خپل کاري دفتر کې د ناروې هېواد شارژدافیر البرټ الساس سره وکتل.په یاده لیدنه کې دواړو لوریو د افغانستان او ناروې تر منځ د اړیکو ترڅنګ په کلتوري مسایلو هم بحث او د نظر تبادله وکړه.د اطلاعاتو و کلتور وزارت وزیر الحاج ملا خیرالله خیرخواه، افغانستان د زرګونه لرغونی سیمو، تاریخي ځایونه او کلتوري میراثونه ټاټوبی یاد کړ او زیاته یې کړه: تاریخي ځایونه او کلتوري میراثونه یوازې د افغانستان نه بلکي د بشریت کلتوري میراثونه دي چې اکثره یې ساتنې او ترمیم ته اړتیا لري.محترم خیرخواه صاحب وویل: د کلتوري میراثونو ساتنه یوازې د افغانانو دنده نه؛ بلکي دا د ټولي نړۍ دنده ده چې په دې برخه کې د افغانستان سره همکاري وکړي.ورپسې البرټ الساس د ناروې هېواد شارژدافیر د افغانستان د کلتوري میراثونو د ساتنې په اړه خبرې وکړې او زیاته یې کړه چې د اړوند ادارو او مؤسسو سره به په دې برخه کې همغږي وکړي او د خپل هیواد له لورې یې له افغانستان سره په مختلفو برخو کې د همکاریو د دوام پر اهمیت ټینګار وکړ.
۱۴۰۳/۱۱/۲۵ ھـ ل
۲۰۲۵/۲/۱۳ مېلادي
