افغانستان د ټولو افغانانو ګډ کور دی، راځئ په ګډه یې ودان کړو
جمعه(۱۰ د ربيع الاول ۱۴۴۶) یادې څرګندونې د اطلاعاتو او کلتور وزارت وزير الحاج ملا خیرالله خیرخواه د روسيې هیواد په سینت پیتربورګ ښار کې د ميشتو افغانانو د کلتوري ټولنې له رئيس او غړو سره د کتنې پر مهال وکړې.
په پيل کې د اطلاعاتو او کلتور وزارت وزير الحاج ملا خيرالله خيرخواه له افغان فرهنګيانو سره په ليدنه خوښي څرګنده کړه او ويې ويل: له څلور لسيزو وروسته اوس افغانستان د يوه داسې نظام څښتن دی، چې په ټول هيواد په کامله توګه حاکميت لري، هيواد کې امنيت حاکم دی، افغانان دې هيواد ته راستانه شي تر څو تر يوه چتر لاندې سره راټول شو او په يووالي سره د هيواد د پرمختګ لپاره کار وکړو.
خيرخواه صاحب زياته کړه؛ په تېرو شلو کلونو کې مو ډيرې امنيتي ستونزې درلودې، اما نن ورځ هر افغان د مصؤنيت احساس لري، د هيواد ګوټ ګوټ ته په ارام زړه سفر کوي، د افغانستان ارضي تماميت او ملي حاکمیت تر پخوا ډير مصؤن دی، له اداري فساد او مخدره موادو سره جدي مبارزه شوې ده، همدا راز امنيتي او دفاعي ځواکونه د هيواد د سرحداتو او ملي نواميسو د ساتنې په خدمت اخته دي او د خلکو، هيواد او آزادۍ له پاره متعهد دي.
ورپسې سینت پیتربورګ ښار کې ميشتو افغانانو په خپل نوبت سره د وړانديزونو او نظرياتو په شريکولو سره له اسلامي امارت څخه ملاتړ څرګند کړ او ويې ويل: نه غواړو چې افغانستان بېرته شاتګ وکړي، اسلامي نظام د هيواد د ټولو ستونزو حل دی، دوی د عامه اذهانو پر روښانه کولو ټينګار وکړ، تر څو د افغانستان اصلي څهره نړيوالو ته ښکاره شي.
په پای کې دواړو لوريو په ارضي تماميت، ملي حاکميت، له ملي او اسلامي ارزښتونو، او د افغانستان له اصلي کلتورونو دفاع باندې ټينګار وکړ.
۲۰۲۴/۹/۱۳ ميلادي
۱۴۰۳/۶/۲۳ هـ ل
