کندوز کې (ملي پیوستون کې د خلکو او حکومت مسؤلیتونه) په نوم لویه غونډه ترسره شوه
د کندوز ولايت د اطلاعاتو او کلتور ریاست د ځوانانو چارو آمریت په همغږۍ او د افغانستان د خلکو غږ مؤسسې په مالي ملاتړ د شمال ختیځ زون په کچه د (ملي پیوستون کې د خلکو او حکومت مسؤلیتونه) په نوم ستره غونډه جوړه شوه.
په دې غونډه کې د کندوز د اطلاعاتو او کلتور رییس مولوي ګلمحمد الیاس، د ګل تپې ولسوالۍ ولسوال مطیعالله روحاني، د ځوانانو چارو آمر قاري داد محمد منصور، د شمال ختیځ زون ولایتونو د اطلاعاتو او کلتور ریاستونو مسؤلینو، ګڼ شمېر ځوانانو، خبریالانو او د امارتي ادارو استازو ګډون کړی و.
غونډې ته د وينا پرمهال د کندوز د اطلاعاتو او کلتور رئيس مولوي ګلمحمد الیاس وویل: د اسلامي نظام تر سیوري لاندې، د مسؤلینو او رعیت ترمنځ هېڅ توپیر نشته، نوموړي د ملي پیوستون او اسلامي ورورولۍ په ارزښت هم ټينګار وکړ.
په دې غونډه کې د بدخشان او بغلان ولایتونو د اطلاعاتو او کلتور رئیسانو ذبیحالله امیري او سید مصطفی هاشمي هم خبرې وکړې او د غونډې د ترسره کولو په برخه کې یې د افغانستان د خلکو غږ مؤسسې د هڅو ستاینه وکړه، دوی د ملي پیوستون، اتحاد او اسلامي وحدت په اړه ګډونوالو ته مهم پیغامونه وړاندې کړل.
غونډه د دعا په لوستلو سره پای ته ورسېده.
۱۴۴۶/۵/۲۵ هـ ق
۱۴۰۳/۹/۷ هـ ل
