کندوز کې د ناسمو رواجونو د مخنیوي په موخه د سیمهییزو رسنیو او خبریالانو د ونډې په اړه غونډه وشوه
د کندوز ولایت د اطلاعاتو او کلتور ریاست له لوري د سیمه ییزو رسنیو مسوولینو او خبریالانو سره غونډه جوړه شوه، چې موخه یې د عالیقدر امیرالمؤمنین حفظه الله د هغه فرمان تشریح وه، چې د خېښیو، ودونو، مصیبتونو او له حج او عمرې څخه د راستنېدو پر مهال د ناسمو او له شریعت سره په ټکر کې رواجونو د مخنیوي په اړه صادر شوی دی.
د ځوانانو چارو آمر د امیرالمؤمنین حفظه الله فرمان له شرعي، ټولنیز او فرهنګي اړخونو تشریح کړ. نوموړي وویل: اسلام د منځلاریتوب دین دی، زموږ ټولنیز پروګرامونه باید له اسراف، ناروا رواجونو، موسیقۍ، ګډو نڅاوو او نورو ناسمو دودونو پاک وساتل شي، د هغه په وینا دا نه یوازې شرعي فریضه ده، بلکې د ولس مادي او معنوي سوکالي پکې نغښتې ده.
همدا راز د اطلاعاتو آمر له اطلاعاتو او کلتور رياست سره د سیمه ییزو رسنیو او خبریالانو تلپاتې همکارۍ وستايلې او غوښتنه یې وکړه، چې د عالیقدر امیرالمؤمنین حفظه الله د دغه فرمان د خپرولو په برخه کې هم د ټولنيز مسؤليت له مخې همکاري وکړئ، تر څو خلکو ته عامه پوهاوی وشي.
د غونډې په پای کې د سیمه ییزو رسنیو مسؤلینو او خبریالانو ژمنه وکړه، چې په یاده برخه کې به فعاله ونډه اخلي او د اسلامي ارزښتونو د ترویج لپاره به خپل رسنیز مسؤلیت ادا کوي.
۱۴۴۷/۱/۷ هـ ق
