کندهار کې د ( ښه کتاب، ښه ژوند) په نامه د کتابونو نندارتون پرانسته وشوه

یاد درې ورځنی نندارتون چې د سنو فارما او روشن مخابراتي شرکت په همکارۍ  په قلم او کتاب مارکیټ کې جوړ شوی، په مختلفو موضوعاتو لیکل شوي زرګونه ټوکه کتابونه او تر ۱۰۰۰ زیاتې بېلابېلې جايزې پکي په  پام کي نیول شوي، چي د کتاب پېریدونکو ته به ورکول کیږي او نندارتون به د سه شنبې تر ورځې دوام ولري.
د نندارتون په پرانېست غونډه کې د کندهار مرستیال والي الحاج مولوي حیات الله مبارک، د اطلاعاتو او کلتور رئیس مولوي انعام الله سمنګاني، د امر بالمعروف، نهی عن المنکر او شکايتونو اورېدو رئیس الحاج مولوي عبدالحی عمري، د پوهنې رئیس مولوي فخرالدین نقشبندي، ډېرو نورو مسئولینو، علماو کرامو، لیکوالانو، شاعرانو،  عامو خلګو او  ځوانانو برخه اخېستې وه.
ښاغلي سمنګاني ټولو مېلمنو ته د ښه راغلاست تر څنګ وویل: د خوشحالۍ ځای دی، چې په داسي خدمت بوخت یو، چي د ولس او کتاب تر منځ رابطه په کې پیاوړې  کیږي، د هغه په وینا؛ کومو ټولنو چي پرمختګ کړی، د کتاب ارزښت ئې پيژندلی، ښه کتاب د ښه ژوند برابرولو سره مرسته کوي.
د نوموړي په وینا؛ دغه نندارتون د ملي نندارتون له پاره پېلامه ده او هڅه کوو، تر څو په راتلونکي کې ملي نندارتون هم جوړ کړو، د سنوفارما، روشن مخابراتي شرکت او د قلم او کتاب مارکیټ له مسئولینو ئې مننه وکړه، چي د یاد نندارتون په جوړولو کي ئې ورسره هر اړخیزه همکاري کړې ده.
 وروسته د پټۍ په پریکولو سره د زرګونو جلده کتابونو د پېرلو او پېردونکو ته د بېلابیلو جایزو ورکړه شروع شوه. 
۱۴۴۵/۶/۱۸ هـ ق
۱۴۰۲/۱۰/۱۰ هـ ش