کندهار کي ځوانانو ته د وړتياو او ظرفيت لوړوني اړوند د عامه پوهاوي سمینار ورکړل شو
د کندهار ولايت د اطلاعات او کلتور رياست د ځوانانو چارو آمر حافظ حمدالله سعيد وویل: دغه يو ورځنی ښوونيز سمینار د کندهار ښار ځوانانو ته د ځوانانو چارو آمريت او د YHDO مؤسسې په ګډه همکارۍ ترسره شو، چي لسګونو ځوانانو پکښي ګډون کړی وو.
د ښاغلي سعيد په وينا؛ په ياد سمینار کې ځوانانو ته د کوچنيانو پر روزنه، د تاوتريخوالي پر مخنيوي، عدالت، د والدينو پر احترام او د ځوانانو د مسؤليتونو په اړه معلومات وړاندې شول،همدارنګه د سمينار په ترڅ کې د ځوانانو په راتلونکي او په ورځنيو چارو کې د دوی په ګډون بحث وشو او دوی ته يادونه وشوه، چې د تعليم ترلاسه کولو تر څنګ په مجالسو کي ګډون کول او ورځنيو چارو کې انرژې مصرفول ډير مهم دي.
د يادونې وړ ده، چي د ځوانانو چارو آمريت ځوانانو ته د علمي، تشويقي او ادبي سمینارونو د جوړولو تر څنګ اوس مهال په روزنيز مرکز کې سلګونو ځوانانو ته د عربي، ترکي، انګليسي ژبو او کمپيوټر زده کړه په وړيا ډول تدريسوي.
۱۴۴۶/۲/۱۷ هـ ق
۱۴۰۳/۵/۳۱ هـ ل
