ځوانان د ټولنې منلي خلک دي، موږ یې قدردانی کوو

د لغمان ولایت د اطلاعاتو او کلتور رئیس مولوي عبدالنور رسولي د دې ولایت د بېلابېلو سیمو له یو شمېر ځوانانو سره وکتل او په یو لړ مهمو مسایلو او رضاکاره فعالیتونو په ترسره کولو یې بحثونه وکړل.
ښاغلي رسولي وویل: ځوانان د ټولنې منلي خلک دي، موږ یې قدردانی کوو دوی باید د ټولنې په اصلاح، سمونه او د نورو ځوانانو په فکري رغونه کې فعاله برخه واخلي.
نوموړي زیاته کړه؛ د ټولنې یووالی او د نظام پرمختګ د ځوانانو په هڅو اتفاق او یووالي سره منځته راځي، دا چې اوس پر ټول هېواد د امن څادر غوړېدلی دی، ځوانانو ته د فعالیت ښه زمینه برابره ده، دوی دې راشي، د فکري اصلاح، د نظام د پایښت او خیر ښېګڼې لپاره دې هڅې وکړي.
ځوانانو د اطلاعاتو او کلتور  ریاست هڅې وستایلې، چې د دوی د یووالي، فکري اصلاح او د غوښتنو اورېدو لپاره یې ترسره کوي او وخت پر وخت ناستې ورسره کوي.
دوی وویل: د نظام د بقا او پایښت لپاره یې تل هڅې کړي دي، له دې وروسته به هم د نظام تر شا ولاړ وي او د ټولنې د سمون او فکري اصلاح لپاره به کار کوي.

۱۴۴۶/۶/۶ ھـ ق
۱۴۰۳/۹/۱۸ ھـ ل