ځوانان د ټولنې د سترګو په حیث دي، خپل مسؤلیتونه باید په ښه توګه ادا کړي
دغه څرګندونې د لوګر ولايت د اطلاعاتو اوکلتور رئيس دوکتور رفیع الله صمیم د دې ولایت له یو شمېر ځوانانو سره په ناسته کې وکړې.
دوکتور صمیم وویل: ځوانان د ټولنې سترګې دي، خپل مسؤلیتونه باید په ښه توګه ادا کړي، نوموړي زیاته کړه، په دې ورستیو کې یو شمېر ځوانان د پردیو په لمسون ټولنيزو رسنيو کې داسې فعالیتونه کوي، چې د افغانیت او اسلامیت سره په ټکر کې دي او دا د ځوانانو مسؤلیت دی، چې د قلم او فکري مبارزې له لارې د دوی پر وړاندې مبارزه وکړي.
دغه راز ښاغلي صمیم له ځوانانو او قلموالو غوښتنه وکړه، چې د لوګر د شهیدانو سوانح راټول او د کتابونو په ډول یې د چاپ په موخه یاد ریاست ته وسپاري.
د ناستې د ګډونوالو په استازیتوب مفتي وحیدالله وهاج او مولوي یوسف رحماني په خپلو خبرو کې وویل: ځوانان هر راز همکارۍ ته ژمن دي، د ځوانانو مسؤلیت ډېر دروند دی، زموږ داعیه د اسلام ده او خپلو ارمانونو ته د رسېدو له پاره هر ډول قربانیو ته چمتو یو.
په پای کې د ناستې ګډونوالو ته بېلابېل کتابونه ډالۍ شول.
۱۴۴۶/۶/۵ هـ ق
۱۴۰۳/۹/۱۷ هـ ل
